MANILA, Philippines – Habang naghahanda ang milyon-milyong deboto para sa Traslacion 2026 sa Biyernes, inihayag ng Quiapo Church ang mga entry at exit points, portalets, at LED viewing screens para gabayan ang mga deboto.
Mga entry route para sa pagdalo sa Misa: Mula Plaza Lacson papunta sa Carlos Palanca Street, pumasok sa Villalobos Street, at magpatuloy sa Plaza Miranda at Quiapo Church. Ang mga deboto mula sa kanluran at hilagang bahagi ay maaaring pumasok mula Rizal Avenue, sa Carriedo Street, hanggang Plaza San Juan Bautista. Ang mga galing hilaga o Quezon City ay maaaring pumasok sa Quezon Boulevard, dumaan sa Quinta Market, pumasok sa Villalobos Street, at magpatuloy sa Plaza Miranda o sa Simbahan. Maaari rin manatili sa labas sa kahabaan ng Quezon Boulevard.
Mga exit route: Ang mga lalabas mula Carriedo at Plaza San Juan Bautista ay dapat dumaan lamang sa mga kalye patungong C.M. Recto Avenue at Rizal Avenue: Evangelista, Palma, Plateria, Padre Gomez, Sales Streets, at Estero Cegado.
LED viewing: Ang mga debotong hindi makakapasok sa simbahan ay maaaring manood sa pamamagitan ng LED screens sa Carriedo Street, Carlos Palanca Street, Quezon Blvd. kanto ng P. Paterno Street at Gonzalo Puyat (Raon), sa ilalim ng footbridge ng Quezon Blvd., Church Plaza Miranda, Church Plaza San Juan Bautista, at Mercury Drug Store.
Emergency lanes: Hinihikayat ng mga awtoridad ang publiko na panatilihing malinis ang hilaga at timog ng Quezon Boulevard at Quezon Bridge upang mabilis ang tugon ng mga rescuer sa emerhensiya.
Portable toilets: Matatagpuan sa Carriedo Street, Hidalgo Street, Carlos Palanca Street (City State, BPI Branch, Barangay Hall 306, sa ilalim ng Quezon Bridge, Carlos Palanca Bridge), at Quezon Boulevard (Gonzalo Puyat/Raon, P. Paterno Street, sa ilalim ng footbridge). RNT
