MANILA, Philippines – Hindi dadalo si dating Pangulong Rodrigo Duterte sa imbestigasyon ng House Quad Committee ngayong araw, Oktubre 22 kaugnay sa mga pagpatay sa drug war sa ilalim ng kanyang pamumuno.
Ayon sa legal counsel ni Duterte na si Martin Delgra III, hindi maganda ang pakiramdam ng dating Pangulo kaya hindi siya makakadalo sa pagdinig ngunit nagsabing sa mga susunod na iskedyul ay dadalo na siya.
“Unfortunately, despite his keen intention to attend, my client respectfully manifests that he cannot attend the public hearing set on 22 October 2024. Aside from the short notice given to him, my client just arrived in Davao from Metro Manila last 17 October 2024,” saad sa liham ni Delgra para kay House QuadComm lead chairman at Surigao del Norte lawmaker Ace Barbers.
“Considering his advanced age and the several engagements he had to attend, he is currently not feeling well and is in need of much rest. Hence, my client respectfully requests to defer his appearance before the Honorable Committee scheduled tomorrow,” dagdag pa ni Delgra.
Sa kabila nito, sinabi ni Delgra na handing dumalo ni Duterte sa mga pagdinig ng QuadComm matapos ang Nobyembre 1.
Matatandaan na naidawit ang pangalan ni Duterte sa mga isiniwalat nina Police Colonel Jovie Espenido at ex-police officer at dating Philippine Charity Sweepstakes Office (PCSO) general manager Royina Garma, kaugnay sa Davao model ng war on drugs na ipinatupad sa buong bansa, at ang reward system sa bawat mapapatay na suspect sa illegal na droga.
Itinanggi naman ni Duterte ang patungkol sa reward system.
“‘Yang sinasabi nilang reward, walang reward ‘yan. Hindi ako magbibigay ng reward,” pahayag ni Duterte sa panayam ng Sonshine Media Network International.
“Ang pinakaano [ng mga pulis] sa akin is ‘pag mission accomplished, yayain ko sila sa restaurant, magkain kami and I congratulate them. Tsaka palainom ang pulis. Bigyan mo ng dalawang boteng scotch…hindi ‘yan tatanggap ng pera. Nahihiya ‘yan,” dagdag pa niya. RNT/JGC
