MANILA, Philippines — Pinabilis ng Department of Justice (DOJ) ang imbestigasyon sa diumano’y anomalya sa flood control, kabilang ang mga kasong plunder na kinasasangkutan nina Sen. Jinggoy Estrada, dating Senador Ramon “Bong” Revilla Jr., at dating Kalihim ng Public Works na si Manuel Bonoan, habang tiniyak ang pagsunod sa due process, ayon kay DOJ Spokesperson Polo Martinez.
Ayon kay Martinez, naipadala na ang subpoenas sa mga respondent upang sila ay magharap at magsumite ng counter-affidavits bilang bahagi ng preliminary investigation, na magtatakda kung may sapat na ebidensya upang isampa ang kaso sa korte.
Ang mga plunder complaints ay nagmula sa ulat ng NBI-DOJ Task Force on Public Works and Anti-Bid-Rigging.
Bukod sa tatlong plunder complaints, may labing-apat pang kaugnay na kaso na nakabinbin, kabilang ang malversation, falsification of public documents, bribery, at paglabag sa Anti-Graft and Corrupt Practices Act. Dalawa sa limang panimulang kaso na kinasasangkutan ng SYMS Construction and Trading ay naisampa na sa Sandiganbayan, habang tatlo pa ang hinihintay ang final resolution.
Binigyang-diin ni Martinez na bagama’t may kasiglahan sa DOJ upang makuha ang mahahalagang ebidensya, hindi dapat isakripisyo ang legal na proseso.
“In the same way po na nirirespeto ng institusyon natin ang mga karapatan ng mga nag-complain, kailangan din pong respetuhin ang mga karapatan ng mga akusado,” ani Martinez. RNT
