Bulacan – Arestado ang 37 anyos na binatang miyembro ng criminal gang matapos umanong mahulihan ng P122,400 iligal na droga sa buy-bust operation ng pulisya sa San Jose Del Monte (SJDM).
Kinilala ang suspek na si Jovet Acosta, 37, binata, tubong Ginubatan, Albay at kasalukuyang residente ng Brgy. Gumaoc West.
Sa report ng SJDM police station, ikinasa ang operasyon, bandang 9:00 ng gabi nitong Nobyembre 5 sa Brgy. Gumaoc West.
Ayon sa report, nakumpiska umano sa operasyon ang nasa 18 grams na pinaghihinalaang shabu na may standard drug price na P122,400.
Sinasabing kasapi ng Cansino Group (Criminal Gang) ang naarestong suspek na nahaharap ngayon sa kaukulang kaso habang nakakulong sa naturang istasyon. (Dick Mirasol III)
