MANILA, Philippines – NANANATILING “financially capable” ang gobyerno para mapanatili ang disaster response efforts sa kabila ng sunod-sunod na kalamidad.
Sinabi ni Presidential Communications Office Undersecretary at Palace Press Officer Claire Castro na kahit pa kinumpirma ng Department of Budget and Management (DBM) na “fully exhausted” o ganap nang naubos ang alokasyon sa ilalim ng National Disaster Risk Reduction and Management (NDRRM) at Quick Response Fund (QRF), maaaring gamitin ng gobyerno ang ₱12.005 bilyon mula sa Contingent Fund.
“Kung mauubos man po ang Contingent Fund dahil sunod-sunod po ang nangyayaring calamity sa ating bansa, maaasahan po natin na kung may excess revenue, makakakuha po tayo sa unprogrammed appropriations mula sa SAGIP,” ayon kay Castro.
At nang tanungin kung pormal na hihiling si Pangulong Ferdinand R. Marcos Jr. sa Kongreso para sa karagdagang emergency funds, winika ni Castro na “no official communication yet.”
“Sa ngayon po ay wala pa po kaming natatanggap na update na nakipag-usap ang Pangulo sa Kongreso,” aniya pa.
Nauna rito, personal na binisita ni Pangulong Marcos ang quake-hit communities sa Davao Oriental, bitbit ang mahigit ₱298 milyong ayuda.
Sinabi naman ng Department of Budget and Management (DBM) na minamadali na nito ang pagpapalabas ng ₱145 milyong emergency funds para tulungan ang mga pamilyang apektado sa Mindanao. (Kris Jose)
