MANILA, Philippines – Inanunsyo ni Manila City Mayor Francisco “Isko” Moreno Domagoso ang paglulunsad ng “Manila Vital Care Kits” para sa mahigit 100,000 residente sa buong kabisera upang palakasin ang kahandaan at katatagan ng lungsod sa panahon ng sakuna at emergency.
Sinabi ni Domagoso na ang bagong inisyatiba ay bahagi ng patuloy na pagsisikap ng kanyang administrasyon upang matiyak na ang bawat sambahayan, paaralan, at lugar ng trabaho sa Maynila ay may kagamitan upang tumugon sa mga emerhensiya.
Nauna nang namahagi ang Pamahalaang Lungsod ng “Emergency Go Bags” noong 2020 sa unang termino ni Domagoso—mga dilaw na bag para sa mga guro at mga asul na bag para sa mga mag-aaral sa mga pampublikong paaralan—na ginagawang pagpapatuloy at pagpapalawak ng programa ng Vital Care Kit ang mga pagsisikap ng Maynila para sa emergency na paghahanda.
Ipapamahagi ang mga kit sa 101,214 na benepisyaryo, na kinabibilangan ng Senior High School at Grade 10 students, Pamantasan ng Lungsod ng Maynila at Universidad de Manila students, barangay officials at tanod, city hall employees, at health center workers.
Sakop din ng programa ang 8,529 regular city employees, 7,229 job order personnel, 1,150 contract-of-service workers, at 4,800 health center staff.
Ang bawat Manila Vital Care Kit ay naglalaman ng mga basic na medikal at emergency response tool, kabilang ang isang blood pressure monitor, glucose monitor system, oximeter, digital thermometer, pill organizer, at antiseptic wipes, kasama ang SILVEX® wound gel, isang advanced na produkto ng pangangalaga sa sugat na nagsisilbing protective barrier laban sa impeksyon hanggang sa tatlong araw.
Sinabi ni Domagoso na ang Manila City Disaster Risk Reduction and Management Office (MCDRRMO) at Health Department ang mangangasiwa sa rollout at makikipag-ugnayan sa mga barangay para sa sistematikong pamamahagi.
Hinikayat din ng alkalde ang mga residente na manatiling mapagbantay kasunod ng mga nagdaang lindol sa Cebu, Davao, at Samar, na sinabing natuto ang lungsod sa mga karanasan nito sa pagtulong sa ibang lokal na pamahalaan sa mga nakaraang kalamidad.
Samantala, nakatakdang ipamahagi ni Yorme Isko sa Miyerkules ang bahagi ng tulong pinansyal sa mga tauhan ng Manila Police District (MPD) na isang taon nang naantala.
Ayon sa alkalde, aabot sa ₱27,865,750 ang financial assistance na ipamamahagi sa mga tauhan ng MPD para sa kanilang operational expenses matapos silang makasingil ng ₱38 milyon mula sa mga contractor na nagbayad ng kanilang obligasyon sa lungsod.
Gayunman, ang ipamamahaging tulong ay para lamang sa buwan ng Hulyo hanggang Setyembre ng taong 2024, bagama’t tiniyak niya na lahat ng paraan ay kanyang ginagawa upang mabayaran ang iniwang obligasyon ng nakaraang administrasyon. (Jay Reyes)
