Goitia: Panahon na para palawakin ugnayan ng Pilipinas at Saudi Arabia sa pamumuhunan

MANILA, Philippines – Naniniwala si Dr. Jose Antonio Ejercito Goitia na panahon na upang palawakin ang ugnayan ng Pilipinas at Saudi Arabia mula sa tradisyunal na labor deployment at remittances tungo sa mas malalim na kooperasyon sa pamumuhunan, kalakalan, enerhiya, food security, at human capital development sa ilalim ng Saudi Vision 2030.

Sa isang eksklusibong panayam sa pahayagang Okaz, sinabi ni Goitia na nagsilbing matibay na pundasyon ng relasyon ng dalawang bansa ang tiwala na nabuo sa loob ng maraming dekada sa pamamagitan ng ambag ng mga overseas Filipino workers (OFWs) sa pag-unlad ng Saudi Arabia.

Ayon sa kanya, panahon na upang gamitin ang matatag na ugnayang ito sa paglikha ng mas maraming oportunidad para sa mga negosyo at mamumuhunan ng parehong bansa.

“Ang trabaho ang nagsilbing tulay upang mabuo ang tiwala ng ating dalawang bansa, ngunit ang tiwala ang tunay na pundasyon ng ugnayang ito. Ang nakikita natin ngayon ay ang paggamit sa matibay na pundasyong iyon para sa mas mataas na layunin,” ani Goitia.

Sinabi niyang malaki ang maiaambag ng mga Pilipinong negosyante, educational institutions, service providers, agribusinesses, at maliliit at katamtamang laki ng negosyo sa patuloy na paglago ng ekonomiya ng Saudi Arabia.

Kabilang aniya sa mga sektor na may malaking potensiyal ang food security, renewable energy, advanced technologies, healthcare, logistics, at digital services.

Ayon pa kay Goitia, hindi sapat ang matibay na relasyong diplomatiko ng dalawang bansa upang maisakatuparan ang mga bagong oportunidad. Aniya, kinakailangan ding palakasin ang ugnayan ng pribadong sektor upang maisalin ang tiwala sa kongkretong pamumuhunan, mga proyekto, at pangmatagalang pakikipagtulungan.

Binigyang-diin din niya na nananatiling pinakamalaking puhunan ng relasyon ng Saudi Arabia at Pilipinas ang matibay na ugnayan ng kanilang mga mamamayan.

Aniya, ang mga Pilipinong matagal nang naninirahan at nagtatrabaho sa Saudi Arabia ay hindi lamang naging bahagi ng labor force kundi naging mahalagang katuwang sa modernisasyon at pag-unlad ng Kaharian.

“Mayroon na tayong tiwala sa isa’t isa. Ang susunod na hakbang ay gawing kongkretong mga proyekto ang tiwalang iyon, mga proyektong kapwa maipagmamalaki at mapakikinabangan ng Saudi Arabia at Pilipinas,” dagdag ni Goitia.

Si Goitia ay Chairman at President ng JACCG Holdings, Inc. at Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). May hawak din siyang Juris Doctor, Doctor of Philosophy (PhD), MNSA, MPA, at MBA. Jay Reyes