MAYNILA – Iginiit ni Chairman Emeritus Dr. Jose Antonio Goitia na walang anumang naratibo o interpretasyon sa kasaysayan ang makapagbabago sa katotohanang bahagi ng teritoryo ng Pilipinas ang lalawigan ng Batanes.
Ang pahayag ay kasunod ng lumabas na ulat na may ilang iskolar na Tsino na nag-uugnay sa Batanes bilang bahagi ng teritoryo ng China. Ayon kay Goitia, matagal nang pinatutunayan ng kasaysayan, batas, at tuluy-tuloy na pamamahala ng Pilipinas ang soberanya ng bansa sa Batanes.
“Hindi naging bahagi ng Pilipinas ang Batanes dahil lamang sa isang deklarasyon. Naging bahagi ito ng ating bansa sa parehong paraan na naging bahagi ng Pilipinas ang bawat lalawigan—sa pamamagitan ng mga salinlahing namuhay rito, nagpalaki ng kanilang mga pamilya, at bumoto bilang mga mamamayan ng Republika ng Pilipinas,” ani Goitia.
Sinabi rin niya na bagama’t bukas ang Pilipinas sa makatotohanang pananaliksik, hindi dapat gamitin ang kasaysayan upang kuwestiyunin ang soberanya ng isang malayang bansa.
Ayon kay Goitia, maaaring talakayin sa akademya ang heograpiya, ugnayang pangkultura, at mga lumang mapa, ngunit hindi nito mababago ang katotohanang ang Batanes ay matagal nang nasa ilalim ng pamamahala ng Pilipinas mula pa noong panahon ng mga Espanyol, administrasyong Amerikano, hanggang sa kasalukuyang Republika ng Pilipinas.
Binigyang-diin din niya na ang soberanya ay hindi nasusukat sa layo ng teritoryo o pagkakapareho ng lahi, kundi sa kasaysayan, batas, mabuting pamamahala, at pagkilala ng mamamayan.
Pinuri rin ni Goitia ang patuloy na paninindigan ng pamahalaan sa pagtatanggol sa integridad ng teritoryo ng bansa, kabilang ang mga hakbang ng Armed Forces of the Philippines, Philippine Coast Guard, Department of National Defense, at Department of Foreign Affairs sa pagsusulong ng pambansang interes sa pamamagitan ng diplomasya at propesyonalismo.
Iginiit niya na hindi galit o takot ang nararapat na maging tugon ng mga Pilipino, kundi pagtitiwala sa kasaysayan, batas, at pagkakaisa ng sambayanan upang mapanatili ang soberanya ng bansa.
“Ang Batanes ay hindi lamang ating pinakahilagang hangganan. Ito ay sagisag ng matibay na ugnayan ng isang bayan at ng kanyang bansa. Ang ugnayang iyon ay hindi mababasag ng mga pagtatangkang baluktutin ang kasaysayan sapagkat ito ay hinubog ng kasaysayan, pinatatag ng kalayaan, at pinananatiling buhay ng bawat salinlahi ng mga Pilipino,” pagtatapos ni Goitia. Jay Reyes
