MANILA, Philippines – Mahigpit na nanawagan si Senador Francis “Kiko” Pangilinan sa lahat ng ahensiya ng pamahalaan, kabilang ang mga local government unit (LGU), na ipagbawal ang pag-aangkat ng bigas at sa halip ay bumili ng butil sa lokal na mga magsasaka gamit ang Sagip Saka Law.
Sa pahayag, sinabi ni Pangilinan, chairman ng Senate Committee on Agriculture and Food, na malaki ang maitutulong sa mga magsasaka kapag sa kanila bibili ang buong makinarya ng pamahalaan na magpapaunlad sa kanilang kabuhayan.
Nakapaloob ang panawagan sa kasunduan na pinagtibay nina Speaker Faustino “Bojie” Dy III, Department of Agriculture (DA) Secretary Francis “Kiko” Laurel, Department of Agrarian Reform (DAR) Secretary Conrado Estrella III, ULAP National President Gov. Dakila “Dax” Cua, Isabela Gov. Rodolfo “Rodito” Albano III, House Committee on Agriculture and Food Chair Rep. Mark Enverga, House Committee on Agrarian Reform Chair Rep. Leah Bulut-Begtang, at National President of the League of Municipalities of the Philippines Mayor Inno Dy.
Ikinatuwa naman ni Pangilinan ang suportang nakuha mula sa mga pangunahing opisyal ng pamahalaan at local chief executives sa ginanap na pulong ng DAR, DA, mga mambabatas, at Union of Local Authorities of the Philippines (ULAP) nitong Huwebes, October 9.
“As far as government purchases of rice are concerned, it has to be locally produced rice. Government corporations, agencies, and local governments should not buy imported rice. They should buy local,” ani Pangilinan.
“Ito na ’yung kailangan natin gawin kasi talagang matindi na po ang tama sa ating mga farmers. Saka kung maaari lamang, Secretary, talagang bawal dapat bumili ang mga government, ang ating mga department, ng mga imported rice. Dapat locally produced rice,” dagdag naman ni Speaker Dy.
Kasunod ito ng apela ni Pangilinan sa Malacañang na magpalabas ng executive order sa pagtatakda ng minimum floor price sa halaga ng palay na bibilhin ng pamahalaan.
“Setting a floor price for palay for government purchases will stabilize the incomes of farmers, who have been forced to sell palay for an average of ₱7.66 per kilo—way below the production cost of ₱13.51 per kilo—because of abusive traders and middlemen,” ayon sa senador.
Aniya, pinakamalaking employer sa bansa ang pamahalaan, kaya kung bibili ito sa lokal na mga magsasaka, magdudulot ito ng pinakamalaking market access sa kanila, kabilang ang mga nagtatanim ng palay at mga mangingisda.
“This falls in line with his 2019 Sagip Saka Act, the landmark law that he authored and passed to allow all national government offices, agencies, and local government units to directly purchase produce from farmers and fisherfolk without public bidding,” ayon kay Pangilinan. — Ernie Reyes
