MANILA, Philippines – Ilang lugar sa Pilipinas ang naapektuhan ng patuloy na pag-ulan nitong weekend dahil sa Habagat at Typhoon Bising (international name: Danas), na nagpababa ng presyo ng mga produktong pang-agrikultura sa hilagang Luzon, at nagdulot ng pagbaha sa Mindanao.
Napilitan ang mga magsasaka sa Benguet na anihin ang kanilang mga pananim nang mas maaga dahil sa pag-ulan, dahilan upang bumaba ang mga presyo nito sa merkado.
“Kahapon talaga ‘yung medyo may kalakihan. Dose ang bigay namin. Kapag tag-ulan kasi, medyo mabilis na ano ‘yung mga gulay, na ma-harvest kasi masisira,” ani ng isang seller sa La Trinidad Trading Post Gloria Calpito, sa GMA’s “24 Oras Weekend” nitong Linggo.
Ramdam din ng mga mangingisda sa Pagudpud, Ilocos Norte ang epekto ng sama ng panahon, dahil napilitan silang itigil ang pangingisda at manatili sa lupa nitong mga nakaraang araw dahil sa lakas ng alon.
Ayon kay Ilocos Norte Provincial Disaster Risk Reduction and Management Office (PDRRMO) representative Marcell Tabije, nakikipag-ugnayan na ngayon ang mga awtoridad upang matiyak na pansamantalang mananatili sa lupa ang mga mangingisda.
“Pinaigting natin ‘yung pagbabantay at pag-info dissemination sa mga fisherfolk natin na huwag munang pumalaot habang malakas ‘yung alon,” ayon sa kaniya.
Ang mga kalye naman sa Mindanao, partikular sa Lalawigan ng Sarangani, ay binaha rin ng tuluy-tuloy na pag-ulan, habang ang mga kanal ng patubig ay bumubuhos, at ang tubig-baha ay pumasok sa mga tirahan sa Barangay Pangyan sa Glan, at isang kapilya sa Barangay Cross.
Sa mga update nitong Linggo ng gabi, sinabi ng PAGASA na ang Bagyong Bising ay muling pumasok sa Philippine Area of Responsibility (PAR), at tinatayang magdadala ng malakas na bugso ng hangin sa Ilocos Region, Cagayan, Isabela, Aurora, Zambales, Bataan, Quezon, Occidental Mindoro, Masbate, at Romblon sa Lunes, lalo na sa mga lugar sa baybayin at kabundukan. RNT/MND
