VATICAN – Pinili ng mga cardinal elector si Cardinal Robert Francis Prevost, isang 69-anyos na paring Augustinian na ipinanganak sa Chicago at may mamamayang Peruano, bilang bagong Santo Papa na may pangalang Leo XIV.
Siya ang kauna-unahang Amerikano at ikalawang Papa mula sa Amerika, kasunod ni Papa Francisco na pumanaw noong Abril 21.
Dati siyang obispo sa Chiclayo, Peru, at inatasan ni Papa Francisco noong 2023 bilang pinuno ng tanggapan ng Vatican na pumipili ng mga obispo sa buong mundo.
Sa kanyang unang mensahe, sinabi niya: “Kapayapaan sa inyong lahat,” at nanawagan na “magtayo ng tulay sa pamamagitan ng diyalogo at pagkikita-kita.”
Pagkatapos ng ikaapat na boto sa conclave, lumabas ang puting usok, hudyat ng pagkakapili ng bagong Papa. Ipinahayag ni Cardinal Dominique Mamberti ang “Habemus Papam” sa gitna ng sigawan ng mga tao. Lumabas si Leo XIV suot ang tradisyunal na pulang kasuotan, kaiba kay Papa Francisco na piniling simple ang kanyang pananamit.
Hinaharap ng bagong Papa ang mga krisis sa Gaza, Ukraine, Sudan, at Myanmar, pati na rin ang mga isyu sa loob ng Simbahan tulad ng pang-aabusong klerikal, papel ng kababaihan, at pagtanggap sa mga LGBTQIA+.
Bago pa ang halalan, sinabi ni Archbishop Charles John Brown na ang susunod na Papa ay magdadala ng mga pagbabago. “Bawat Papa ay may sariling pananaw. Pinangangalagaan niya ang aral ng Simbahang Katoliko, ngunit ipinapahayag niya ito sa sarili niyang paraan,” dagdag niya. RNT
