MANILA, Philippines – Nasa 491,395 sasakyan ang nadagdag sa mga kalsada sa Pilipinas noong 2025 na muntik nang maabot ang 500,000-unit sales target ng local automotive manufacturers.
Sa datos mula sa Chamber of Automotive Manufacturers of the Philippines Inc. (CAMPI) at Truck Manufacturers Association (TMA), tumaas ng 3.7% ang industry sales noong 2025 mula sa 473,842 unit noong 2024.
Nag-ambag ang mga electric vehicle sa paglago ng sales na umabot sa 58,903 units o 12% ng total industry sales sa nasabing taon, mas mataas ng 5.5% noong 2024.
Napanatili ng Toyota ang market leadership sa 46.7% share, sinundan ng Mitsubishi sa 18.0%, Suzuki sa 4.5%, Ford sa 4.4%, at Nissan sa 4.2%.
Noong Disyembre lamang, nakapagbenta ang CAMPI at TMA ng 42,870 units, o mas mataas ng 2.0% mula sa 42,044 units na naibenta noong Disyembre 2024 na nagmarka ng pinakamalakas na monthly performance ng industriya mula noong 2017.
“We attribute last year’s achievement to aggressive promotional campaigns and new product introductions that expanded consumer options, particularly in the electrified and commercial vehicle segments,” saad sa pahayag ni CAMPI President Jose Maria Atienza.
Patuloy sa pangunguna sa sales ang commercial vehicles sa 81.32% ng kabuuan nito, o 34,861 units habang ang passenger cars ay bumubuo sa 18.68% o 8,009 units.
Sa vehicle type, nanguna ang light commercial vehicles sa 24,669 units, at sinundan ng Asian utility vehicles sa 9,266 units.
Ang electric vehicle sales noong Disyembre ay umabot naman sa 4,358 units, kabilang ang 3,717 hybrid electric vehicles, 349 battery electric vehicles, at 292 plug-in hybrid electric vehicles.
Kabilang din sa monthly sales ang 526 light-duty trucks at bus, 379 medium-duty trucks at bus, at 21 heavy-duty trucks and bus. RNT/JGC
