MANILA, Philippines- Itinalaga ni Pangulong Ferdinand R. Marcos Jr. si Department of Migrant Workers (DMW) Undersecretary Hans Leo Cacdac bilang kalihim ng departamento.
Isang taon matapos na italaga siya bilang officer-in-charge noong Abril 8, 2023 ay pamumunuan na ngayon ni Cacdac ang DMW.
Matatandaang iniupo ng Pangulo si Cacdac bilang officer-in-charge ng DMW makaraang pumanaw si dating DMW secretary Susan “Toots” Ople noong Agosto ng nakaraang taon.
Bago ang kanyang ad interim appointment sa Gabinete, nagsilbi si Cacdac bilang Undersecretary ng DMW; Executive Director V ng Overseas Workers Welfare Administration (OWWA); Executive Director V ng Philippine Employment Administration (POEA); at Undersecretary ng Department of Labor and Employment (DOLE).
Nagsilbi rin siya bilang Deputy Executive Director V ng POEA; Executive Director IV ng National Conciliation Mediation Board-DOLE; Director IV ng Bureau of Labor Relations-DOLE; at Associate Lawyer and Urban Poor Unit Coordinator ng Sentro ng Alternatibong Lingap Panligal (SALIGAN) sa pribadong sektor. Kris Jose
