MANILA, Philippines – Posibleng umabot sa 45 degrees Celsius ang heat index sa Puerto Princesa City, Palawan sa Lunes, Nobyembre 16, na maaaring magdulot ng panganib sa kalusugan ng mga residente.
Batay sa ulat ng INQUIRER.net mula sa forecast ng Philippine Atmospheric, Geophysical and Astronomical Services Administration (PAGASA), inaasahan ding aabot sa 43°C ang heat index sa Coron, Palawan at Zamboanga City.
Pasok ang tatlong lugar sa danger category ng PAGASA, na may heat index na 42°C hanggang 51°C.
Nagbabala ang ahensya na maaaring magdulot ng heat cramps, heat exhaustion at heat stroke ang matagal na pagkakalantad sa matinding init.
Ang heat index ay ang temperaturang nararamdaman ng katawan dahil sa pinagsamang epekto ng init ng hangin at humidity.
Pinayuhan ng PAGASA ang publiko na uminom ng sapat na tubig, iwasan ang matagal na pagbibilad sa araw at gumamit ng payong o sombrero kapag lalabas.
Inirerekomenda ring gawin ang mabibigat na aktibidad sa mas malamig na oras ng araw upang makaiwas sa mga sakit na dulot ng matinding init. RNT
