MANILA, Philippines – Naitala sa Bangsamoro Autonomous Region in Muslim Mindanao (BARMM) ang pinakamataas na classroom congestion sa elementary at secondary schools noong School Year 2022-2023, sinabi ng Department of Education (DepEd) nitong Miyerkules, Agosto 7.
Sa pagdinig ng Senate committee on basic education, sinabi ni DepEd Assistant Secretary for Field Operations Francis Bringas na mayroong mahigit 45 estudyante sa bawat silid-aralan sa BARMM, na maikokonsiderang congested.
“This validated ratio is [SY] 2022-2023 but we expect the same trend in [SY] 2023-2024 and this year,” dagdag pa niya.
Iniulat ni Bringas na batay sa National School Building Inventory, mayroong “high congestion” sa senior high school classrooms sa BARMM, sinundan ng National Capital Region, Region 7, at Region 4-A.
“For the junior high school, we have high congestion in BARMM, NCR, and then region 4-A. This is above the ideal ratio that we have, this is above 45,” dagdag pa niya.
Ani Bringas, mayroong kinakailangang 150,000 silid aralan para maabot ang ideal student-to-classroom ratio.
“The current estimate per classroom is around P3.5 to P5 million,” dagdag pa.
Nakakita rin ang BARMM ng pagtaas sa student enrollment.
Ayon kay Minster Mohagher Iqbal ng Bangsamoro Ministry of Basic, Higher, and Technical Education, iniulat ang kabuuang 1,038,662 estudyante na nag-enroll para sa SY 2022-2023.
Ang enrollment para sa SY 2023-2024 ay tumaas din ng 17% sa 1,258,253 estudyanteng nag-enroll sa pampublikong paaralan, government-run madaris o Islamic schools, at community learning centers na nag-aalok ng basic education, secondary education, at higher education. RNT/JGC
