PAMPANGA, Philippines – Nag-deploy ang Philippine National Police – Police Regional Office 3 ng mahigit 13,000 personnel sa Central Luzon bilang paghahanda sa pagdagsa ng mga biyahero, deboto, at turista ngayong Holy Week.
Mula sa orihinal na 2,000 tauhan, pinalaki ang deployment upang masigurong ligtas ang publiko sa mga simbahan, lansangan, at iba pang lugar na dinarayo.
Simula March 30, inilagay na sa full alert status ang PRO-3 upang matiyak ang maximum police visibility at mabilis na responde sa anumang insidente.
Naglagay rin ang pulisya ng foot at mobile patrols, assistance desks sa simbahan at terminals, at road safety marshals para sa trapiko.
Layunin nito na mapanatili ang kaayusan at kaligtasan habang dumarami ang tao sa SUMVAC (Summer Vacation) 2026.
Patuloy ang paalala ng pulisya sa publiko na maging mapagmatyag at makipagtulungan upang maging ligtas ang paggunita ng Holy Week. RNT/MND
