Higit 192K apektado ng baha sa Maguindanao del Sur – NDRRMC

MANILA, Philippines- Hindi bababa sa 192,00 indibidwal o 38,689 pamilya ang apektado ng pagbaha sa Maguindanao del Sur sa gitna ng malakas na pag-ulan dulot ng Inter Tropical Convergence Zone (ITCZ), base sa National Disaster Risk Reduction and Management Council (NDRRMC) nitong Lunes.

Sa ulat, sinabi ng NDRRMC na sa kabuuang bilang ng mga apektado, 890 indibidwal o 178 pamilya ang nananatili sa evacuation center habang 191,115 indibidwal o 38,511 pamilya ang nakikisilong sa ibang lokasyon.

Naiulat ang pagbaha sa ilang barangay sa mga sumusunod na bayan:

• Datu Abdullah Sangki

• Shariff Aguak

• Datu Saudi Ampatuan

• Ampatuan

• Shariff Saydona Mustapha

• Datu Hoffer Ampatuan

• Mamasapano

• Datu Piang

• Sultan sa Barongis

• Datu Salibo

• Guindulungan

Napinsala umano sa mga pagbaha ang tatlong bahay habang dalawang road sections at tulay ang apektado.

Sinabi ng NDRRMC na hanggang noong May 14, nakararanas ang Mindanao ng “cloudy skies with scattered rains and thunderstorms due to the ITCZ.”

Nagresulta ito sa pagbaha sa ilang munisipalidad sa Maguindanao del Sur, dagdag ng NDRRMC. RNT/SA