MANILA, Philippines- May kabuuang 203,839 agrarian reform beneficiaries (ARBs) sa buong bansa ang nakakuha ng kanilang titulo ng lupa mula sa Department of Agrarian Reform (DAR) noong 2024.
Batay sa news release na ipinalabas ng DAR noong Martes, sinabi nitong 211,751 titulo ng lupa ang ipinamahagi sa iba’t ibang panig ng bansa, binubuo ng 134,736 electronic titles at 77,015 certificates of land ownership award sa ilalim ng regular land acquisition and distribution (LAD) components ng Comprehensive Agrarian Reform Program.
Kada farmer beneficiary ay maaaring makatanggap ng hanggang tatlong titulo ng lupa para sa segregated land areas.
Ayon kay DAR Undersecretary for Policy, Planning, and Research Luis Meinrado Pañgulayan sa naunang panayam, sa 203,839 ARB beneficiaries, 126,810 ang nakatanggap ng titulo sa pamamagitan ng Support to Parcelization of Lands for Individual Titling project at 77,029 sa ilalim ng regular LAD program.
Magugunitang nangako si DAR Secretary Conrado Estrella III na kukumpletuhin ang land distribution program sa termino ni Pangulong Ferdinand R. Marcos Jr. hanggang 2028.
“The DAR remains steadfast in its mission to implement agrarian reform, as mandated by the 1987 Constitution, through land tenure improvement, agrarian justice and the coordinated delivery of essential support services to ARBs,” wika ni Pañgulayan. RNT/SA