MANILA, Philippines – Taliwas sa pananaw ng ilan, hindi si Senador Francis “Chiz” Escudero ang napupusuan ng bagong mayorya na manguna sa impeachment trial ni Vice President Sara Duterte sa susunod na buwan.
Sa panayam, kinumpirma ni Senate President Pro-Tempore Sherwin Gatchalian na isa ang pangalan ni Pangilinan sa ikinokonsiderang italaga bilang presiding officer ng impeachment court dahil abogado ang mambabatas.
Aniya, nagkakaroon ng deliberasyon sa hanay ng mayorya sa posibilidad na italaga ang isang abogadong senador na pangunahan ang impeachment trial, isang Kasunduan na iminungkahi ni dating Senate President Vicente Sotto III.
“Tama ka, sinabi ni Sen. Sotto ‘yun. At ‘yan ang kasalukuyang pinag-uusapan,” tugon ni Gatchalian sa tanong kung isa si Pangiilinan sa ikinokonsiderang manguna sa impeachment trial.
Kasunod ito ng preparasyon ng Senado, ayon kay Gatchalian, para sa impeachment proceedings kabilang ang pagpapalabas ng pretrial notices sa magkabilang kampo , ang depensa at prosecution team.
“Yes, I signed the notice for pretrial yesterday. So pinadala na namin ‘yan both to the defense and the prosecution team,” aniya.
Pero, sinabi ni Gatchalian na wala pang pinal na desisyon ang bagong mayorya kay Pangilinan.
“No final decision has been made on who will ultimately preside over the impeachment court, the matter remains under discussion among senators as they prepare for the start of the trial next month,” ayon kay Gatchalian. Ernie Reyes
