MANILA, Philippines – Arestado sa ikinasang buy-bust operation ng mga miyembro ng Station Drug Enforcement Unit (SDEU) ng Pasay City police ang isang high value individual (HVI) na Children in Conflict with the Law (CICL) Miyerkules ng madaling araw, Agosto 21.
Kinilala ni Pasay City police officer-in-charge P/Col. Samuel Pabonita ang nadakip na suspect na si alyas Boss, 17, kabilang sa drug watchlist ng Pasay City police bilang HVI at isang miyembro ng kilabot na Sigue-Sigue Sputnik (SSS) Gang.
Base sa report na isinumite ni Pabonita sa Southern Police District (SPD), naganap ang pagdakip kay alyas Boss bandang alas 2:10 ng madaling araw sa isinagawang buy-bust operation sa No. 1920 Leveriza St., Barangay 34, Zone 3, Pasay City.
Sa isinagawang operasyon ay narekober sa posesyon ng suspect ang 51.6 gramo ng hinihinalang shabu na nagkakahalaga ng P350,880.
Nahaharap sa kasong paglabag sa Sections 5 at 11, Article 2 ng Republic Act 9165 (Comprehensive Dangerous Drugs Act of 2002) ang suspect na kasalukuyang nakapiit sa custodial facility ng Pasay City police. James I. Catapusan
