Ika-29 anibersaryo ng Las Piñas, ipinagdiwang

Ipinagdiwang ng Pamahalaang Lungsod ng Las Piñas City ang ika-29 anibersaryo ng pagiging lungsod at ika-119 anibersaryo ng pagkakatatag nito sa pamamagitan ng isang buwang serye ng mga aktibidad sa pangunguna nina Mayor April Aguilar at Vice Mayor Imelda Aguilar.

Sinimulan ang selebrasyon noong Marso 11 sa pamamagitan ng nationwide mass anti-rabies vaccination kasabay ng National Rabies Awareness Month, na sinundan ng oral health program sa ilang barangay noong Marso 12 hanggang 13. Inilunsad din ang anniversary billboards at binuksan ang 29th Cityhood Bazaar noong Marso 23, gayundin ang tatlong araw na exhibit ng United Artist of Las Piñas at Sarao jeepneys.

Umabot sa 142 pares ang ikinasal sa isinagawang Kasalang Bayan noong Marso 25 sa Barangay Pamplona Tres, habang itinampok ang mga lokal na talento sa variety show sa City Hall grounds noong Marso 26, kabilang ang Las Piñas Cityhood Dancers at guest performer na si Raven Heyres.

Nakatakda rin ang Cityhood Job Fair sa Robinsons Place Las Piñas sa Marso 27, at magtatapos ang selebrasyon sa pet adoption drive sa SM Center Las Piñas sa Marso 29.

Sa kanyang mensahe, binigyang-diin ni Aguilar ang kahalagahan ng kasaysayan at pag-unlad ng lungsod.

“Ang araw na ito ay pagkilala sa ating pinagmulan kasama ang minana nating mga kultura, kinagisnang tradisyon at hanggang sa mga hakbang na ating nilakbay bilang isang maunlad na komunidad,” aniya.

“This city has shaped who I am. Every community I have served, every family I have met, and every story I have heard continues to guide me in the way I lead,” dagdag pa niya.

Binanggit din ni Aguilar ang mga natamong parangal ng lungsod kabilang ang pagiging Hall of Famer sa cleanest and greenest city sa Metro Manila, gayundin ang Seal of Good Financial Housekeeping, Seal of Good Local Governance, at Gawad Kalasag.

“We honor the past because it defines our responsibility today,” aniya.

Iginiit din niya na nananatiling prayoridad ang kalusugan, edukasyon, at kabuhayan sa pamamagitan ng pagpapalawak ng serbisyong medikal, libreng edukasyon, at mga programang pangkabuhayan.

“This anniversary is a reminder that our work continues. We move forward with discipline, clarity, and commitment to serve.” RNT