MANILA, Philippines – Pormal nang inilunsad ng Metropolitan Manila Development Authority (MMDA) ang “Yes to Ayos” Disiplina Campaign sa Pasay City bilang bahagi ng kampanya ng ahensya na palakasin ang disiplina at aktibong partisipasyon ng mga estudyante at komunidad tungo sa mas malinis at maayos na Metro Manila.
Pinangunahan ni MMDA Chairman Atty. Don Artes ang panunumpa ng suporta sa programa sa ginanap na paglulunsad sa Timoteo Paez Elementary School. Ayon kay Artes, mahalagang maitanim ang disiplina sa murang edad upang lumaki ang mga kabataan bilang responsableng mamamayan.
Inihayag din niya na nakatakdang makipagtulungan ang MMDA sa Department of Education (DepEd) upang makabuo pa ng mga programang magpapalawak sa kampanya, alinsunod sa layunin ng administrasyon ni Pangulong Ferdinand Marcos Jr. na magkaroon ng mas malinis, disiplinado at maayos na Metro Manila.
Binigyang-diin naman ni MMDA General Manager Nicolas Torre III na mahalagang isama ang mga estudyante sa kampanya dahil sila ang pag-asa ng bayan at magiging susi sa pagpapanatili ng disiplina sa hinaharap.
Aniya, marami sa mga suliraning kinahaharap ng MMDA ay nag-uugat sa kakulangan ng disiplina, partikular sa tamang pagtatapon at pamamahala ng basura. Hinikayat din niya ang mga magulang na turuan ang kanilang mga anak ng wastong pagtatapon ng basura at pagsunod sa mabubuting asal.
Nagpasalamat naman si Pasay City Mayor Imelda Calixto-Rubiano sa MMDA sa pagdadala ng kampanya sa lungsod. Aniya, hindi lamang disiplina ang isinusulong ng “Yes to Ayos” kundi pati pananagutan ng bawat mamamayan.
Ayon sa alkalde, layunin ng Pasay na maging kauna-unahang sustainable at eco-city, at naniniwala siyang malaking tulong ang kampanya upang maisakatuparan ito.
Sa nasabing programa, muling ipinaalala ng MMDA ang 15 “Yes to Ayos” Code, kabilang ang paglilinis ng mga estero, pagsunod sa batas-trapiko, tamang pagtatapon ng basura, pagsasabuhay ng 4Rs (Refuse, Reuse, Reduce at Recycle), pag-iwas sa paninigarilyo at pagvi-vape, tamang pagpila, pagiging maagap, magalang, tapat, malinis at laging handa sa sakuna.
Nakiisa rin sa aktibidad ang Eco-TINGIndahan ng Mother Earth Foundation na namahagi ng libreng bigas, suka, toyo at mantika kapalit ng mga recyclable materials.
Kasabay nito, ipinatupad din ng MMDA ang programang “Recyclables Mo, Palit Grocery Ko” ng Metro Manila Flood Resilience Foundation (MMRF), kung saan maaaring ipagpalit ng mga residente ang kanilang recyclable materials sa mga grocery item. JAY Reyes (larawan ni Cesar Morales)
