Home NATIONWIDE Ilang opisyal ng DA itinalaga sa pangangasiwa, pagmonitor sa rice, livestock sectors

Ilang opisyal ng DA itinalaga sa pangangasiwa, pagmonitor sa rice, livestock sectors

MANILA, Philippines – Itinalaga ni Agriculture Secretary Francisco Tiu Laurel Jr. ang ilang opisyal ng Department of Agriculture (DA) para pangasiwaan ang mga kritikal na programa na layong palakasin ang rice, livestock at agricultural sectors ng bansa.

Sa pahayag nitong Sabado, Enero 18, sinabi ng DA na itinalaga si Glenn Estrada bilang officer-in-charge ng Office of the Executive Director sa Fertilizer and Pesticide Authority.

Si Estrada ay mangangasiwa sa regulasyon ng fertilizer at pesticide trade para masiguro na ang mga magsasaka ay mayroong access sa essential inputs para mapabuti ang kanilang produksyon.

Samantala, inilagay naman si Senior Agriculturist Ralph Alan Ceniza bilang Deputy Program Director ng National Rice Program.

Tutulungan ni Ceniza ang pamahalaan sa hakbang nitong mapalakas pa ang rice production at maabot ang self-sufficiency sa bigas.

Para matugunan naman ang mga suliranin sa livestock industry, katulad ng disease outbreaks at market instability, sinabi ng Agriculture Department na itinalaga nila si Dr. Jonathan Sabiniano bilang program director ng National Livestock Program.

Susuportahan si Sabiniano ni Alvin Paul Dirain bilang deputy program.

Dagdag pa, si Emerson Yago na ang Director-Designate for Rice Clustering and Consolidation sa ilalim ng Masagana Rice Industry Development Program.

Tututukan ni Yago ang pagpapalakas sa kolaborasyon sa mga magsasaka at pagpromote ng modern practices para mapalakas ang rice production.

Ilan din sa mga bagong opisyal ay sina Dr. Ronnie Ernst Duque, bilang officer-in-charge ng Deputy Executive Director’s office sa National Meat Inspection Service (NMIS), at Arnold Atienza bilang Executive Director ng Philippine Fiber Industry Development Authority (PhilFIDA).

“These designations underscore DA’s commitment to strengthen key agricultural sectors to support farmers, enhance food security, and drive economic growth,” ani Tiu Laurel. RNT/JGC