ILOCOS NORTE, Philippines — Naitala sa Ilocos Norte ang 2,501 kaso ng dengue at tatlong pagkamatay mula Enero hanggang unang bahagi ng Oktubre 2026, ayon sa Provincial Epidemiology and Surveillance Unit (PESU) nitong Biyernes, Oktubre 16.
Sa pinakahuling datos ng PESU, nakapagtala ang lalawigan ng 107 bagong kaso noong Morbidity Week 40, mula Oktubre 4 hanggang 10.
Patuloy na hinihikayat ng mga awtoridad sa kalusugan ang publiko na mag-ingat upang mapigilan ang pagkalat ng dengue, na naipapasa sa kagat ng infected na lamok na Aedes.
Pinapayuhan ang mga residente na regular na linisin at alisan ng tubig ang mga lalagyan, alisin ang naipong tubig sa paligid, panatilihing malinis ang kapaligiran, at gumamit ng mosquito repellent o damit na panangga sa kagat ng lamok.
Pinayuhan din ang publiko na magpakonsulta agad kapag nakararanas ng mataas na lagnat, matinding sakit ng ulo, pananakit ng katawan, pagduduwal o pantal. Nangangailangan naman ng agarang medical attention ang matinding pananakit ng tiyan, tuloy-tuloy na pagsusuka, pagdurugo o kakaibang pagkaantok. RNT/MDS
