MANILA, Philippines – Sinabi ng Department of Justice (DOJ) nitong Miyerkules, Oktubre 29 na magpapatuloy pa rin ang imbestigasyon ng pamahalaan sa mga anomalya sa flood control projects kahit na hindi makipagtulungan dito ang mag-asawang contractor na sina Pacifico “Curlee” at Sarah Discaya.
“As far as we are concerned, we are not dependent on what the Discayas have to say or have to offer. We can proceed with whatever investigation we believe we can go on,” sinabi ni Prosecutor General Richard Anthony Fadullon sa isang press briefing.
Nauna nang binawi ng mga Discaya ang kanilang suporta sa Independent Commission for Infrastructure (ICI) sa imbestigasyon sa umano’y maanomalyang flood control projects.
Sinabi ni ICI Executive Director Brian Hosaka na binawi ng mag-asawa ang kanilang kooperasyon matapos sabihin ni Commissioner Rogelio Singson na wala pa silang nakikitang kwalipikado para maging state witness.
Samantala, sinabi ng Office of the Ombudsman na walang tsansa ang mga Discaya na maging state witness dahil mayroon silang malaking kaugnayan sa mga anomalya.
Ayon kay Assistant Ombudsman Mico Clavano, ang mga Discaya “are deemed to be hostile witnesses and can only be charged as respondents.” RNT/JGC
