MANILA, Philippines – INANUNSYO ng Department of Agriculture (DA) na binawi na nito ang temporary ban sa pag-angkat ng baboy at iba pang swine products mula Spain matapos kilalanin ang ‘regionalization’ ng European country para sa African Swine Fever (ASF).
Pormal na kinilala ng Department Circular No. 22 ang regionalization measures ng Spain para sa ASF, pinapayagan ang pagpapatuloy ng pag-angkat ng karne ng baboy, balat ng baboy at iba pang swine by-products sa ilalim ng napagkasunduang sanitary conditions sa pagitan ng Maynila at Madrid.
Ipinagpalagay ng Bureau of Animal Industry sa ginawang pagrerebisa nito na napananatili ng Spain ang sapat na veterinary oversight at disease-control measures para bawasan ang panganib ng ASF transmission sa pamamagitan ng imported pork products.
Kapuwa isinapinal naman ng Pilipinas at Spanish veterinary authorities ang technical conditions na namamahala sa mga pagpapadala mula sa itinuturing na low-risk zones.
Sa ilalim ng bagong direktiba, “all import transactions from Spain must comply with bilateral import protocols, Philippine quarantine regulations, and the guidelines under Administrative Circular No. 12 series of 2025, which established the framework for bilateral recognition of ASF regionalization among accredited trading partners.”
Matatandaang nagpataw ang Pilipinas ng temporary ban sa Spanish pork imports noong nakaraang taon sa pamamagitan ng Department of Agriculture Memorandum Order No. 75 matapos mapaulat ang kaso ng ASF sa ilang bahagi ng Europa, dahilan para higpitan ang border controls para protektahan ang local hog industry.
Sa isang kalatas, sinabi ni Agriculture Secretary Francisco Tiu Laurel Jr. na ang hakbang ay inaasahan na makatutulong sa pag-iba-iba ng meat supply sources at pagaanin ang presyur sa domestic pork prices.
Tinuran pa nito na ang nasabing desisyon ay sumasalamin sa isang ‘calibrated approach’ sa pagitan ng pangalagaan at ingatan ang local agriculture at tiyakin ang food security.
“We remain vigilant against ASF, but we also recognize the importance of science-based risk assessment and international cooperation in securing stable food supply chains,” ang sinabi ni Tiu Laurel.
“Allowing imports from properly regulated and monitored areas in Spain helps diversify our pork sources while maintaining strict animal health standards,” aniya pa rin. KRIS JOSE
