MANILA, Philippines – Nahuli kamakailan sa Terminal 3 ng Ninoy Aquino International Airport (NAIA) ang isang pinaghihinalaang impostor, ayon sa Bureau of Immigration (BI).
Kinilala ang suspek bilang si Nimo Ahmed Hassan, 21, babae at may hawak na Swedish passport.
Ayon sa BI, inirefer siya sa secondary inspection matapos mapansin ng primary immigration officers ang mga hindi pagkakatugma sa kanyang passport habang susubukang umalis papuntang Italy sa pamamagitan ng Qatar Airways.
Ayon kay Immigration Commissioner Joel Anthony Viado, tunay ang passport ngunit “the officers’ training, supported by biometric face-referencing technology, clearly indicated that the holder was not the rightful owner of the document.”
Natukoy na nagmula si Hassan sa East Africa, ngunit patuloy ang imbestigasyon upang matukoy ang kanyang tunay na pagkakakilanlan at ang totoong travel documents niya.
Dinala si Hassan sa holding facility ng BI habang isinasagawa ang deportation proceedings laban sa kanya. RNT/MND
