MANILA, Philippines – Kakalkalin ni Senador Risa Hontiveros ang “ironically unfair’ consumer protection policies ng Energy Regulatory Commission (ERC) kasunod ng ulat hinggil sa maling billings sanhi ng maling meter readings sa gitna ng paghihirap ng consumer sa pagtaas ng singil sa kuryente.
Sa pahayag, sinabi ni Hontiveros na inihain ang Proposed Senate Resolution No. 509 na naglalayong suriin kung sapat ang Republic Act No. 9136, o ang Electric Power Industry Reform Act (EPIRA), at ang Magna Carta for Residential Electricity Consumers sa pagbibigay ng sapat na proteksiyon sa households na naghain ng reklamo sa irregular na electricity bill sanhi ng maling meter reading.
“ERC has a mandate to protect electric consumers, but some of its current policies may be placing the burden on the very people it is supposed to protect. Kailangang tingnan ang mga polisiyang ito at i-update kung kailangan,” ani Hontiveros.
Binanggit sa resolusyon ang reklamo mula sa consumer na nakatanggap ng unusually high electricity bills sanhi ng incorrect meter readings.
“While the ERC advised consumers to pay disputed bills under protest to avoid possible disconnection, Meralco said customers with pending billing disputes are not required to pay the contested amount while their cases are under review,” ayon sa resolusyon.
Nakalagay din sa resolusyon na nagsasabing kinikilala ng Magna Carta for Residential Electricity Consumers ang karapatan na kuwestiuinin ang electric bill, advisory ng ERC na inaatasan ang consumer na bayaran ang inirereklamong singilin bilang pangangailangan na idulog ang maling billing.
“Bakit nasa konsyumer ang responsibilidad na iwasto ang maling paniningil sa atin? Kailangan muna nating bayaran ang maling bill para hindi tayo maputulan, at kailangan tayo pa ang magpresenta ng mga patunay at dokumento. Kung hindi madedetect ng konsyumer na may mali sa ating reading, walang makakaalam na may problema. ” ayon kay Hontiveros.
Tinukoy din ng resolusyon na “while the Magna Carta for Residential Electricity Consumers provides consumers with the right to protest a disputed bill, it does not address the impact of a bill shock to distressed consumers who, faced with unclear policies, feel compelled to pay the disputed amount for fear of disconnection”.
“Ang nakikita kong dapat gawin ay iwasto ang Magna Carta for Residential Electricity Consumers. Dapat klaro na kapag may maling singil, hindi mapwersa ang mga kababayan natin na magbayad para makaiwas sa abala,” ani Hontiveros.
Sinabi ni Hontiveros na kailangan nang lutasin ang isyu dahil patuloy na nahaharap ang consumer sa mataas na singil sa kuryente.
“Since February, power rates have increased several times, including this month’s ₱0.3428 per kilowatt-hour in generation charges, further adding to the financial strain on Filipino households,” aniya.
“Hindi puwedeng habang nahihirapan na ang mga konsyumer na itama ang maling billing, tayo rin ang sunod-sunod na sinasalubong ng pagtaas ng singil sa kuryente. Kung may mga patakaran na naglalagay sa kanila sa alanganin, panahon na para repasuhin at baguhin ang mga ito para matiyak na ito ay makatarungan at tunay na pro-consumer,” patapos ng senadora. Ernie Reyes
