MANILA, Philippines – Isang tao ang naiulat na namatay sa Western Visayas sa pananalasa ng Tropical Cyclones Goring at Hanna, sinabi ng National Disaster Risk Reduction and Management Council (NDRRMC) ngayong Biyernes.
Sa pinakahuling ulat nito, sinabi ng NDRRMC na ang impormasyon sa pagkamatay ay para pa rin sa validation.
Samantala, idineklara na ang state of calamity sa Pototan, Iloilo nitong Huwebes sa gitna ng epekto ng tropical cyclones, ayon sa NDRRMC.
May kabuuang 387,242 katao o 106,677 pamilya ang naapektuhan nina Goring at Hanna sa Ilocos, Cagayan, Central Luzon, Calabarzon, Mimaropa, Western Visayas, at Cordillera Administrative Region (CAR).
Sa apektadong populasyon, 21,701 katao o 5,152 pamilya ang nananatili sa 293 evacuation centers habang 24,827 indibidwal o 6,092 pamilya ang naninirahan sa ibang lugar.
May kabuuang 482 bahay ang nasira — 371 partially at 111 totally — sa Ilocos, Cagayan, Calabarzon, Mimaropa, Western Visayas, at CAR.
Naiulat din ang pinsala sa agrikultura na nagkakahalaga ng P395,246,593 at sa imprastraktura na nagkakahalaga ng P41,216,200, ayon sa NDRRMC.
Nararanasan ang power supply interruptions sa anim na lugar sa Calabarzon at Western Visayas. Ang mga problema sa suplay ng tubig ay naranasan din sa dalawang lugar sa parehong mga rehiyon.
Dahil hindi pa rin umaandar ang 71 daungan, sinabi ng NDRRMC na 234 na pasahero, limang motorbanca, at isang barko ang na-stranded sa Calabarzon at Western Visayas.
May kabuuang 240 klase at 94 na iskedyul ng trabaho ang nasuspinde dahil sa mga bagyo.
Naibigay na ang tulong na nagkakahalaga ng P16,498,997 sa mga biktima, sabi ng NDRRMC.
Nitong Biyernes ng umaga, sinabi ng state weather bureau PAGASA na napanatili ng Severe Tropical Storm Hanna ang lakas nito sa Philippine Sea at patuloy na magpapalakas ng southwest monsoon o Habagat.
Lumabas sa Philippine Area of Responsibility ang Super Typhoon Goring noong Miyerkules. RNT
