MANILA, Philippines – Sinabi ni George Villanon Jr., isa sa 18 umano’y “maleta boys” at dating bodyguard ni dating Ako Bicol Rep. Zaldy Co, na inalok umano sila ng ₱20 hanggang ₱25 milyon bawat isa kapalit ng pagbawi ng kanilang affidavit na nag-uugnay kina Pangulong Ferdinand Marcos Jr., dating House Speaker Martin Romualdez, at iba pang opisyal ng gobyerno sa umano’y anomalya sa mga flood control project.
Ayon kay Villanon, may mga nag-aalok sa kanila ng pera upang bumaliktad, ngunit hindi niya pinangalanan kung sino ang nag-alok.
Nagbitiw siya ng pahayag matapos apat sa kanyang mga kasamahan ang lumagda sa affidavit of recantation at nagsabing hindi totoo ang mga nakasaad sa kanilang naunang joint affidavit.
Iginiit ni Villanon na hindi totoo na nais ding magbawi ng pahayag ang iba pang “maleta boys” at sinabi niyang mananatili silang tapat sa kanilang mga naunang salaysay.
Pinuna rin niya ang apat na nagbawi ng pahayag at sinabing sana ay pinag-isipan nilang mabuti ang kanilang ginawa at hindi nagpadala sa pera.
Samantala, itinanggi ng kanilang abogado na si Atty. Levito Baligod ang paratang na kumita siya mula sa paggawa ng joint affidavit ng kanyang mga kliyente.
Noong Pebrero, unang ipinakilala ni Baligod ang 18 lalaki bilang mga dating Marine na nagsabing nagsilbi silang mga “bagmen” ni Zaldy Co sa umano’y paghahatid ng ₱805 bilyong kickback mula sa mga kuwestiyonableng flood control project. RNT/MDS
