MANILA, Philippines — Inilunsad ng pamahalaan ang “Handa: The Integrated Platform for Preparedness, Early Warning, and Response,” isang website na naglalaman ng pinagsamang impormasyon kaugnay ng sakuna upang mapahusay ang kahandaan at pagtugon sa disaster.
Maaaring ma-access ang platform sa handa.georisk.gov.ph at binuo ng Department of Science and Technology (DOST) sa pamamagitan ng Philippine Institute of Volcanology and Seismology (Phivolcs), kung saan pinagsama-sama ang iba’t ibang umiiral na sistema para sa early warning, preparedness, at response.
Sa paglulunsad sa Quezon City, sinabi ni DOST Secretary Renato Solidum Jr. na layunin ng platform na tugunan ang kakulangan sa real-time risk information.
“One of the most persistent challenges in disaster risk reduction is not the absence of data but the fragmentation of information,” aniya.
“Across institutions, we generate vast and valuable datasets on hazards, exposure and vulnerability. Often, these remain dispersed across systems, limiting their full potential,” dagdag pa niya.
Pinag-isa ng website ang mga advisory mula sa Phivolcs, weather bureau, at mines and geosciences bureau, at nag-aalok ng near real-time monitoring, location-based alerts, AI-assisted tools, at interactive dashboards.
Maaaring mag-report ang mga user ng insidente tulad ng pagbaha, sunog, at aksidente sa kalsada upang mapabilis ang koordinasyon sa emergency response. Mayroon ding SOS alert feature na nagpapahintulot na maibahagi ang lokasyon sa mga responder, gayundin ang AI-powered chatbot para sa hazard, weather, at safety information.
“We developed tools, making risk information more accessible to communities,” ani Solidum.
“Through the Handa platform, we are advancing a multidisciplinary approach that connects science, governance and communities. Together we can ensure that knowledge becomes action, and action becomes resilience,” dagdag pa niya. Santi Celario
