Home NATIONWIDE Japan, nais magtatag ng Network sa pagbabahagi ng impormasyon tungkol sa mga...

Japan, nais magtatag ng Network sa pagbabahagi ng impormasyon tungkol sa mga sakuna sa Asya

2
0

MANILA, Philippines – Balak ng gobyerno ng Japan na magtatag ng isang network na magbabahagi ng impormasyon at kaalaman tungkol sa mga likas na sakuna na naipon sa Timog-Silangang Asya. Ito ay batay sa impormasyong nakuha ng Jiji Press.

Layunin ng Japan na gamitin ang network upang mahikayat ang mga bansa sa Asya na magpatupad ng mga sistema ng maagang babala (Early Warning Systems) na nagsusuri ng datos mula sa lagay ng panahon at nagbibigay ng babala bago pa man mangyari ang mga sakuna.

Ipapahayag ang planong ito sa ika-31 Conference of the Parties (COP31) ng United Nations Framework Convention on Climate Change na gaganapin sa Turkey.

Ang mga sistema ng maagang babala ay gumagamit ng datos mula sa mga satellite at radar upang mabigyan ng babala ang mga taong posibleng maapektuhan ng mga sakuna.

Kabilang sa mga halimbawa nito sa Japan ang sistema ng pamahalaan para sa babala sa heatstroke at ang serbisyong tinatawag na “Kikikuru,” na nagpapakita sa mapa ng panganib ng pagguho ng lupa at pagbaha.

Noong 2023, sinimulan ng Japan ang isang proyekto na pinagtutulungan ng pamahalaan at pribadong sektor upang palaganapin ang paggamit ng mga serbisyong may sistema ng maagang babala sa rehiyon ng Asia-Pacific.

Nagsagawa ito ng pananaliksik tungkol sa pangangailangan ng merkado at posibilidad ng pagpapatupad ng mga naturang sistema sa mga bansang kasapi ng Association of Southeast Asian Nations (ASEAN).

Sinuportahan din nito ang mga kumpanyang nagnanais magsimula ng mga kaugnay na negosyo sa mga bansang ito.

Sa Thailand, kung saan malaking problema ang biglaang pagbaha dulot ng pabago-bagong lagay ng panahon, nagbibigay ang Japanese company na Weathernews, Inc. ng impormasyon tungkol sa panahon, kabilang ang mga pagtataya at babala sa biglaang malalakas na pag-ulan sa ilang lugar.

Sa pamamagitan ng planong network, nais ng pamahalaan ng Japan na ibahagi ang kaalaman at mga matagumpay na halimbawa mula sa anim na bansa ng ASEAN.

Layunin din nitong mapabilis ang pagpapatupad ng mga sistema ng maagang babala sa buong Asya upang makatulong na mabawasan ang pinsala at pagkawala ng buhay at ari-arian na dulot ng pagbabago ng klima. (KRIS JOSE)

LEAVE A REPLY

Please enter your comment!
Please enter your name here