MANILA, Philippines — Lalahok sa kauna-unahang pagkakataon ang combat troops ng Japan sa Balikatan 2026 exercises kasama ang Pilipinas at Estados Unidos, ayon sa Armed Forces of the Philippines (AFP).
Ayon kay AFP Chief General Romeo Brawner Jr., magsisimula ang taunang joint military drills sa Abril 20 at tatagal hanggang Mayo, na inaasahang magiging pinakamalaki sa kasaysayan nito.
“For the very first time after a very, very long time, combat troops from Japanese Self-Defense Forces will be coming here to the Philippines to join us in the Balikatan Exercise,” ani Brawner.
Dagdag niya, mananatiling malaki ang saklaw at intensidad ng ehersisyo sa kabila ng mga pandaigdigang tensyon, kabilang ang sigalot sa Middle East.
“We received the confirmation from [US Indo-Pacific Command head Admiral Samuel Paparo] himself. He said that this will still be the biggest Balikatan Exercise despite the war going on in Middle East,” aniya.
“Sabi niya hindi tayo maaapektuhan. Tuloy pa rin lahat ng ating mga pinlano na mga activities and yung scale and scope ay pareho pa rin,” dagdag niya.
Ayon kay Brawner, ipapakita ng Balikatan 2026 ang pagkakaisa ng Pilipinas, Estados Unidos, at Japan.
“Kung 81 years ago in 1945, we found ourselves on opposite sides of the war, this time, we find ourselves on the same side, on the same side of that effort to promote a rules-based international order. Kasi ang ibang mga bansa, ang pinopromote lang nila ay sarili lang nilang interes, and they do this through coercion,” aniya.
Kabilang din ang Australia sa mga lalahok, at isasagawa ang iba’t ibang aktibidad tulad ng field training exercises, command post exercises, cyber defense operations, at paggamit ng space technology.
Makikibahagi rin ang iba pang ahensya ng pamahalaan tulad ng Office of Civil Defense, Philippine Coast Guard, at Philippine National Police. Santi Celario
