BACOLOD CITY – Nanawagan ang mga residente ng pananagutan mula sa lokal na pamahalaan matapos bahain ang mahigit kalahati ng 61 barangay ng Bacolod dahil sa malakas na ulan na dala ng Tropical Depression Verbena nitong Martes.
Iniulat ng Department of Social Services and Development na 5,318 pamilya, o 15,896 katao, ang nanuluyan sa higit 60 evacuation centers, bagama’t 2,791 pamilya ang nakabalik na sa kanilang mga tahanan pagsapit ng Miyerkules ng tanghali.
Umabot hanggang kisame ang baha sa ilang bahagi ng Barangay Singcang-Airport, habang dibdib-taas ang tubig sa Barangay Mandalagan.
Nagsagawa rin ng mga rescue operation ang Bureau of Fire Protection at Philippine Coast Guard sa Pahanocoy, Sum-ag, at Banago.
“Our relief operations continue today to ensure the basic needs of our fellow Bacolodnons affected by the typhoon,” ani Mayor Greg Gasataya.
Lalo pang lumakas ang panawagan para sa pananagutan matapos ihayag ng Council of Concerned Citizen (C3), sa pangunguna ni Atty. Cesar Belario Jr., na magsusumite sila ng reklamo sa iba’t ibang pambansang ahensya.
Ayon sa C3, “These are not just (because of rains) – they are the consequences of years of irregularities in our flood-control projects. Bacolod deserves better – and together, we will fight for it.”
Kinuwestiyon din sa social media ang humigit-kumulang PHP4.28 bilyong pondong inilaan sa flood-control projects mula 2017 hanggang 2025.
Tanong ni Association of Negros Producers chairperson Arlene Infante: “So? Where na this? We just can’t blame a few sacks of basura clogging the creeks.” Nag-post din ang page na “Revolutionary Bacolod” na: “We need answers. We need accountability. We need our money back.” RNT
