MANILA, Philippines- Bahagyang lumubog ang isang barko na dati nang nagkaaberya sa Balwharteco Port sa Barangay Looc, Allen, Northern Samar nitong May 14.
Ang MV Reina Hosanna na sumadsad sa Capul, Northern Samar noong Pebrero 11 dahil sa engine failure at pag-aari ng Montenegro Shipping ay maayos na na-tow patungong Allen, isang araw matapos itong sumadsad .
Kinumpirma ng Philippine Coast Guard (PCG) na iniulat ng crew ng MV Reina Hosanna na lumubog ang kalahati nito habang nakadaong sa pantalan. Hindi pa tukoy ang eksaktong sanhi ng insidente hanggang sa ngayon.
Agad namang nagtungo ang CGS Northern Samar sa lugar upang tasahin ang sitwasyon at makipagtulungan sa Marine Environmental Protection Unit sa mga potensyal na hakbang upang maiwasan ang anumang oil spill.
Walang ulat ng oil spill o leakage sa kasalukuyan. Ang mga kamakailang insidente na kinasasangkutan ng MV Reina Hosanna ay nagdulot ng mga alalahanin tungkol sa kaligtasan ng barko at ang epekto sa kapaligiran ng kasalukuyang estado nito.
Nagpapatuloy ang imbestigasyon sa insidente upang matukoy ang mga pangyayari na humahantong sa bahagyang paglubog ng barko sa Balwharteco Port. Jocelyn Tabangcura-Domenden
