Bulacan – Patay ang isang kapitan del baryo na nagsasagawa ng clean up drive matapos pagbabarilin ng hindi nakilalang riding-in tandem sa bayan ng Angat.
Kinilala ang biktima na si Wenceslao Bernardo, nasa hustong gulang, may-asawa, Brgy. Chairman at residente ng Capistrano st. Brgy. Marungko.
Sa report ng pulisya, nangyari ang insidente bandang 6:30 ng umaga nitong Agosto 3 sa Sitio Tugatog, Brgy. Marungko.
Ayon sa imbestigasyon, habang naglilinis ang biktima kasama ang kanyang mga kababaryo sa nabanggit na lugar ay may biglang sumulpot na magka-angkas lulan ng puting Yamaha Aerox.
Nabatid na bumaba ang back rider at walang kaabog-abog na dalawang beses binaril ang biktima sa likurang bahagi ng ulo.
Mabilis na tumakas ang mga suspek sa direksyon ng Bustos habang isinugod naman ang biktima sa Twin Care Hospital subalit patay na ito.
Nang makarating sa mga awtoridad ang nangyari ay agad nagsagawa ng dragnet at follow operation para mahuli ang mga suspek. (Dick Mirasol III)
