ILOCOS SUR-Patay ang driver ng tricycle samantalang sugatan ang dalawang pasahero nito matapos na banggain ng Isuzu Elf ang kanilang sasakyan sa Brgy. Parioc 1st, Candon City ng lalawigang ito kahapon ng umaga.
Kinilala ng Candon City Police Station ang driver ng tricycle na si Raffy Ramos y Buyao, 53, may asawa, residente ng naturang lugar.
Nakasakay sa naturang tricycle ang dalawang menor de edad na pasahero nito na edad 15 at 13 na parehong residente rin ng Parioc 1st, Candon City, Ilocos Sur.
Nakilala naman ang driver ng Isuzu Elf na si Adrian Sotto y Isara, 31, walang asawa, residente ng Sta. Cruz, Lubao, Pampanga at ang dalawang helper na kasama nito na sina Joey Cenajo y Bogero, 28, walang asawa, at Romeo Dela Cruz y Marcial, kapuwa residente ng Brgy. San Isidro, Lubao, Pampanga.
Ayon sa witness na nakausap ng mga personnel ng Candon City Police Station, ang dalawang sasakyan na parehong nasa outer lane ng Bypass Road ay parehong bumibiyahe papuntang hilagang direksyon.
Pagdating sa pinangyarihan ng insidente ay lumipat sa inner lane ang Isuzu Elf at nabangga nito ang likuran ng tricycle.
Tumilapon sa kalsada ang driver ng tricycle at pagkatapos ay nasagasaan ng Isuzu Elf.
Nagtamo naman ng mga galos sa iba’t ibang parte ng kanilang katawan ang dalawang pasahero nito.
Ang tatlo ay agad na isinugod Candon City Hospital.
Gayunman, ang driver ng tricycle ay idineklarang dead-on-arrival ng umatending doktor.
Hindi naman nasaktan sa naturang insidente ang driver ng Isuzu Elf at ang mga kasama nito. Rolando S. Gamoso
