MANILA, Philippines – Naghain ng isang resolusyon si Senador Sherwin Gatchalian upang talupan ang lahat ng bangko na posibleng kasangkot sa pagpapatayo ng Philippine Offshore Gaming Operators (POGO) sa bansa.
Sa pahayag, sinabi ni Gatchalian na ipinasisiyasat sa Senate Resolution 1193 ang lahat ng kahina-hinalang transaksyon sa ilang bangko na may kinalaman sa POGO at kabiguan na sitahin at matukoy ito.
Ayon kay Gatchalian, ang nakaraang mga pagsisiyasat ng Senado sa ilang POGO-related activities ay nagsiwalat ng transaksyon sa bangko na kinasasangkutan ng mga kumpanyang pag-aari ni Guo Hua Ping, na nakilala bilang Alice Guo, na nagkakahalaga ng daan-daang milyong piso.
Nagbigay daan dito ang pagtatayo at pagtatatag ng POGO hub sa Bamban.
Sinabi ng senador na hindi katumbas o higit pa sa kakayahan o financial capacity ng mga kumpanya na nakasaad sa kanilang financial statement ang malaking halagang nabanggit.
“Ang pagdaloy ng pera, disbursement ng tseke, at ilang transaksyon na kinasasangkutan ng nasabing Guo account ay pinakamataas noong 2020 na lubhang hindi pangkaraniwan kasunod ng pagtama ng Covid-19 na nagparalisa sa mga negosyo at ekonomiya sa buong mundo,” sabi ni Gatchalian.
Tanong niya, paano dumaloy ang malaking halaga ng pera kung hindi na-flag ng mga bangko.
“Ang kabiguan ng mga bangkong ito na iulat ang mga kahina-hinalang transaksyon ay nagbukas sa usapin ng pagiging epektibo o hindi ng kanilang internal control at mga patakaran,” sabi niya.
Binigyang-diin niya na ang mga ganitong pangyayari ay nagdudulot ng mga katanungan tungkol sa kasapatan ng umiiral na mga regulasyon at alituntunin laban sa money laundering at counter-terrorism financing (ATM-CTF) para sa mga bangko at institusyong pampinansyal.
Idinagdag pa ng senador na ang Republic Act 9194 o ang Anti-Money Laundering Act of 2001 ay nagmamandato sa lahat ng sakop na institusyon, kabilang ang mga bangko, na iulat ang lahat ng lahat kahina-hinalang transaksyon sa Anti-Money Laundering Council sa loob ng limang araw.
“Nananatili ang Pilipinas sa gray list ng Financial Action Task Force, at kailangang paghusayin ng ating bansa ang mga aktibidad nito laban sa money laundering at counter-terrorism financing. Ang suporta at pagsunod ng pribadong sektor ay mahalaga sa pagpapalakas ng ating AML-CTF, kabilang ang pagsunod sa mga obligasyon ng AMF-CTF,” pagtatapos niya. Ernie Reyes
