MANILA, Philippines – Iginiit ni House Committee on Justice chairperson at Batangas Rep. Gerville Luistro na katotohanan at pananagutan ang dapat manaig sa huling impeachment hearing laban kay Vice President Sara Duterte ngayong Miyerkules.
Sa kanyang opening statement, sinagot ni Luistro ang panawagan ng kampo ni Duterte na maging maingat ang komite sa mga hakbang nito.
“Ang sabi ng kampo ng Bise Presidente: ‘Let us be cautious.’ Ang sagot natin: ‘Let us be truthful.’ Magpakatotoo tayo,” ani Luistro.
Ayon sa mambabatas, ang pagdinig ay hindi na lamang nakatuon sa mga discrepancies sa SALN at kinuwestiyong transaksyon sa ilalim ng Anti-Money Laundering Council. Aniya, ang pokus ngayon ay ang katangian ng Bise Presidente matapos ang mga seryosong alegasyon ng pananakot.
“So, let us be clear: This is no longer just about discrepancies. This is now about character,” dagdag niya.
Nakatakdang suriin ng komite ang mga pahayag at video footage mula sa National Bureau of Investigation (NBI) kaugnay ng mga banta ni Duterte noong 2024 laban kina Pangulong Ferdinand Marcos Jr., First Lady Liza Araneta-Marcos, at Speaker Martin Romualdez.
“We will examine allegations involving threats, intimidation, and possible violence. May mga video, may mga salita, may mga pahayag na kailangang patunayan,” paliwanag ni Luistro.
Kinuwestiyon din ng mambabatas ang integridad ni Duterte bilang opisyal ng gobyerno. Ayon sa kanya, dapat matukoy kung ang Bise Presidente ba ay sumusunod sa batas o naniniwalang mas mataas siya rito.
Aniya, “Sino ba talaga ang Bise Presidente? Is she a public servant bound by the same laws as the person on the street or one who believes she is above the law?”
Ang desisyon ng komite ay magsisilbing batayan kung iaakyat ang reklamo sa plenaryo para sa posibleng Senate trial.
“Our mandate is clear, and our resolve is firm. Guided by the Constitution, anchored on evidence, and faithful to the trust of the Filipino people, we shall continue this hearing,” pagtatapos ni Luistro. Gail Mendoza
