Pinangunahan ng Department of Energy (DOE) ngayong Biyernes ang groundbreaking para sa pagtatayo ng kauna-unahang energy museum sa bansa na layong palakasin ang kaalaman ng publiko tungkol sa enerhiya at sistemang elektrikal.
Ayon sa DOE, tutulong ang museo na punan ang kakulangan sa energy literacy sa pamamagitan ng mga hands-on at madaling unawaing eksibit. Tampok dito ang kasaysayan ng enerhiya at ang umuunlad na power system ng bansa.
Isinagawa ang seremonya sa Energy Center sa Taguig City para sa 1,164-square-meter na pasilidad at pinangunahan ni Energy Secretary Sharon Garin. Dumalo rin ang mga industry at institutional partners na mag-aambag ng mga eksibit at modular learning pods.
Sinabi ng DOE na gagamit ang mga exhibit pod ng mga environment-friendly na materyales tulad ng recycled composites, natural fibers, at low VOC paints, at susunod sa mga pamantayan ng energy-efficient at sustainable construction.
Agad nang sisimulan ang konstruksyon, at target na mabuksan ang museo sa Mayo ngayong taon.
“Now more than ever, we need an informed public about energy. This museum will make energy easy to understand for every Filipino. It will show the journey of electricity from source to socket and help learners and communities see how everyday choices on efficiency and safety contribute to a stronger energy future. We want this to be a launchpad for education, curiosity, and innovation,” ani Garin.
Itatampok din sa museo ang mga kuwentong nakatuon sa Pilipinas, kabilang ang mga lokal na proyekto sa kuryente, mga programa ng DOE, at ang mga hamon sa pagbibigay ng maaasahan at abot-kayang suplay ng kuryente sa kapuluan.
“Energy is the lifeblood of our nation, and when every Filipino understands how electricity flows from our resources to the grid and into our communities, we turn knowledge into confidence and curiosity into capability,” ani Garin.
“This museum will be where our energy story is learned, shared, and advanced for generations.” Dave Baluyot
