ILOCOS SUR-Isa nang malamig na bangkay ang isang lalaki nang matagpuang palutang-lutang sa isang water irrigation sa Brgy. Cuantancia, Cabugao ng lalawigang ito kahapon ng umaga, Agosto 26.
Kinilala ng Cabugao Municipal Police Station ang natagpuang bangkay na si Reynold Agcaoili y Valoria, 52, may asawa, driver, residente ng naturang lugar.
Nabatid na bandang 10:00 ng gabi ng Agosto 25 ay dumalo ang biktima sa debut party ng isa niyang kalugar na babae.
Ayon sa ina ng debutant, nakita niya ang biktima bandang 12:30 ng madaling-araw ng August 26 na nasa impluwensiya ng alak at ito’y pauwi na.
Bandang 7:00 ng umaga ng Agosto 26 nang makita ang bangkay ng biktimang palutang-lutang sa water irrigation sa naturang lugar.
Hinala ng mga residente ay may posibilidad na nahulog sa naturang water irrigation ang biktima habang naglalakad pauwi dahil sa kalasingan.
Ang biktima ay dinala sa Ilocos Sur District Hospital sa Sinait, Ilocos Sur ng mga rumespondeng personnel ng Cabugao MPS.
Gayunman, ang biktima ay idineklarang patay na ng umatending doktor. Rolando S. Gamoso
