ILOCOS SUR- Tigok ang isang 32-anyos na lalaki matapos pagbabarilin sa Brgy. Bungro, Magsingal ng lalawigang ito kagabi.
Kinilala ng Magsingal Municipal Police Station ang biktima na si Joshua Rodiño Bañaga, may asawa, kolektor ng San Basilio Cooperative, residente ng naturang lugar.
Nakasakay sa kanyang motorsiklo ang biktima at papuntang hilagang direksyon sa national highway sa naturang lugar nang sundan at pagbabarilin ng hindi nakilalang suspek o mga suspek na mabilis na tumakas pagkatapos na pagbabarilin ang biktima.
Nagtamo ng tatlong tama ng bala sa kanyang likuran ang biktima na agad na isinugod sa ospital ng mga rumespondeng PNP at BFP personnel.
Gayunman, ang biktima ay idineklarang dead-on-arrival ng umatending doktor.
Patuloy ang ginagawang imbestigasyon ng mga awtoridad para alamin kung ano ang motibo sa krimen at tukuyin kung sino ang salarin o mga salarin. Rolando S. Gamoso
