MANILA, Philippines- Arestado ang isang 20-anyos na lalaki at nahaharap sa patong-patong na kaso matapos saktan at i-blackmail ang kanyang dating kasintahan nitong Miyerkules.
Kinilala ng Rizal Police Provincial Office (PPO) ang suspek na si “Vince.” Nadakip siya kasunod ng reklamong inihain laban sa kanya ng dati niyang kinakasama.
Base sa biktima, pisikal umano siyang sinasaktan ng suspek at pinagbantaan siyang ikakalat ang kanyang sensitibong videos kung tatanggi itong makipagkita sa kanya.
Agad na rumesponde ang mga tauhan ng Angono Municipal Police Station, na nagresulta sa pagkakahuli sa suspek.
Sa pag-aresto, narekober din ng mga pulis ang isang improvised shotgun at tinatayang apat na gramo ng marijuana mula sa suspek.
Kasalukuyang nakaditene ang suspek sa Angono Custodial Facility at mahaharap sa mga kaso sa ilalim ng Republic Act 10591 (Firearms Law), RA 9165 (Comprehensive Dangerous Drugs Act of 2002), at RA 9262 (Anti-Violence Against Women and Their Children Act). RNT/SA
