MANILA, Philippines – Inaresto ng National Bureau of Investigation (NBI) ang isang lalaki na umano’y nanloko sa gadget distributors at resellers ng tinatayang ₱25 milyong halaga ng Apple products sa Pasay City.
Hindi isinapubliko ang pagkakakilanlan ng suspek na naaresto sa isang entrapment operation ng NBI-Cybercrime Division habang tinatangkang tapusin ang isang transaksyon gamit ang umano’y falsified check.
Ayon sa NBI, nahuli ang suspek in flagrante delicto at kasalukuyang nasa kustodiya ng ahensya. Nahaharap siya sa kasong estafa kaugnay ng Section 6 ng Republic Act No. 10175 o Cybercrime Prevention Act of 2012, paggamit ng falsified documents, at paggamit ng fictitious names.
Nag-ugat ang pag-aresto sa reklamong inihain ng isa sa mga reseller na nabiktima ng suspek. Lumabas sa imbestigasyon na nagpanggap ang suspek bilang authorized representative ng isang lehitimong kumpanya nang walang pahintulot o kaalaman nito.
“Investigation revealed that the Subject falsely represented himself as an authorized representative of a legitimate company, without the knowledge or authority of said company, in order to gain the trust of distributors and resellers,” ayon sa NBI.
Sa pamamagitan ng panlilinlang, nakakuha ang suspek ng high-value Apple products at gumamit ng falsified check bilang bayad sa mga transaksyon.
Pinayuhan ng NBI ang mga negosyante na maging maingat sa kanilang mga transaksyon.
“We urge business owners to exercise the highest level of due diligence: verify every identity, scrutinize every transaction, and ensure you are dealing only with authorized representatives to protect your interests from those who hide behind false titles,” ayon sa NBI. Dave Baluyot
