ILOCOS SUR- Tigok ang isang STL collector matapos na mabangga ng van ang minamaneho nitong motorsiklo sa Brgy. Pug-os, Sinait ng lalawigang ito nitong Biyernes ng gabi.
Ayon sa pulisya, ang driver ng kulay pulang Honda Wave ay isang 40-anyos na lalaki, walang asawa, residente ng Brgy. Paratong, Sinait, Ilocos Sur.
Ang driver naman ng Mercedez Benz 100 van ay isang 29-anyos na lalaki, may asawa, residente ng Brgy. 14, Tartarabang, Pinili, Ilocos Norte.
Bumibiyahe ang van papunta sa hilagang direksyon sa national highway sa naturang lugar nang pumasok sa lane nito ang motorsiklo na walang head lights na galing ng west outer lane na nagresulta sa banggaan ng dalawang sasakyan.
Nagtamo ng sugat sa iba’t ibang parte ng kanyang katawan ang walang suot na helmet na driver ng motorsiklo na agad na isinugod sa Ilocos Sur District Hospital sa naturang bayan ng mga rumespondeng PNP, BFP at MDRRMO personnel.
Gayunman, ang driver ng motorsiklo ay idineklarang dead-on-arrival ng umatending doktor.
Hindi naman nasaktan sa naturang insidente ang driver ng van. Rolando S. Gamoso
