MANILA, Philippines — Muling itutuloy ang konstruksyon ng luxury upland development na Monterazzas de Cebu matapos bawiin ng pamahalaang lungsod ng Cebu ang naunang suspension order kasunod ng isinagawang inspeksyon at independent review.
Naunang ipinatigil ang proyekto noong nakaraang taon dahil sa umano’y mga paglabag at sa pagkakadawit nito sa pagbaha dulot ng pananalasa ng Bagyong Tino. Gayunman, binawi ng city council ang stoppage at cease-and-desist order matapos suriin ang mga resulta ng imbestigasyon.
Ayon kay Mont Property Group general manager Camille Bondad, walang kinalaman ang proyekto sa pagbaha sa mga kalapit na lugar, batay sa pag-aaral ng University of the Philippines Institute of Environmental Science and Meteorology.
“The Monterazzas side does not and cannot flow into Liloan, Cotcot, Mananga and the other impacted areas. These communities sit in different watersheds with their own distinct hydrological conditions,” ani Bondad.
Dagdag niya, ipagpapatuloy ng kumpanya ang proyekto “carefully, responsibly and in full coordination with the concerned agencies.”
Sinabi ni Bondad na nakapagtayo na ang developer ng 18 detention ponds bago pa man ang bagyo upang kontrolin ang daloy ng tubig, na may kapasidad na halos doble sa itinakda sa kanilang Environmental Compliance Certificate (ECC). Layunin ng mga ito na saluhin at dahan-dahang pakawalan ang tubig-ulan upang maiwasan ang biglaang pag-agos pababa.
Nagdagdag pa umano ang developer ng limang detention ponds at inayos ang mga nasira matapos ang bagyo. Ayon din sa pag-aaral ng University of the Philippines, nakatulong ang mga pond na ito sa pagbawas ng water runoff.
Samantala, sinabi ni legal counsel Marcelino Rongo na sumunod ang kumpanya sa mga rekisito ng Environmental Management Bureau at naisumite na ang mga dokumento sa Cebu City council.
Idinagdag niya na ibinasura ng city prosecutor ang reklamo hinggil sa umano’y unauthorized tree cutting dahil sa kakulangan ng ebidensya.
“The prosecutor found that there was no sufficient evidence,” ani Rongo.
Ayon sa developer, nakikipag-ugnayan na ito sa Department of Environment and Natural Resources para sa susunod na hakbang ng proyekto.
Sinabi rin ng Mont Property Group na pinag-aaralan nito ang posibleng legal na aksyon laban sa umano’y online disinformation kaugnay ng proyekto.
“Some appeared to be digitally altered and really taken out of context… For those who had spread malicious intent, of course, we are carefully reviewing it and if need be we will be doing the applicable legal actions for it,” dagdag pa ni Bondad.
Tinatayang 60 porsiyento nang kumpleto ang proyekto. Mary Anne Sapico
