MAKATI, Philippines – Patay ang isang konduktor matapos ang suntukan sa pagitan niya at ng dalawa pang lalaki ay nauwi sa insidente ng pamamaril sa loob ng terminal ng public utility jeepney (PUJ) sa Brgy. Guadalupe Nuevo, Makati City noong Lunes, Setyembre 15.
Ayon sa pulisya, nagkaroon ng mainitang pagtatalo ang biktima at isang lalaking pasahero na kinilalang si alyas Dustin, 19, residente ng Taguig City.
Ilang sandali pa ay dumating sa lugar ang kuya ni Dustin na kinilalang si alyas Darwin, 37, at ipinagtanggol ang kanyang nakababatang kapatid sa pamamagitan ng pagsalakay sa biktima.
Nakipagsuntukan ang tatlong lalaki bago bumunot ng baril si Darwin at binaril ang biktima ng maraming beses, na agad na ikinamatay nito. Mabilis na nakatakas ang magkapatid sa pinangyarihan.
Sinabi ni Makati City Police OIC Col. Reycon Garduque na dalawang saksi ang positibong kinilalang si Darwin ang bumaril.
Nasa terminal ang isa sa mga testigo, 37-anyos na residente ng Taguig, habang ang isa pang testigo mula sa Barangay Katuparan, Taguig City, ay nakilala ang suspek sa pamamagitan ng rouge gallery.
Naglunsad ng follow-up operation ang pulisya at nahuli si Darwin sa isang bus terminal sa Calamba, Laguna. Naglunsad din ng manhunt operation laban kay Dustin na nananatiling nakalaya.
Sinabi ni Garduque na sasampahan ng kasong murder si Darwin. RNT/MND
