MANILA, Philippines – Ituturing sana ni Sen. Panfilo “Ping” M. Lacson na papuri ang paglalarawan sa kanya ni Sen. Alan Peter Cayetano bilang “Chief Justice,” “Prosecutor” at “Department of Justice,” at iba pa — kung nagmula ito sa isang may kredibilidad na nilalang.
Ayon kay Lacson, ang pagtatangka ni Cayetano na palabasing ginagampanan niya ang papel ng imbestigador at tagausig ay maaari pa ngang pagkilala sa kanyang pagpupursiging magtanong at mangalap ng ebidensya — at maipasailalim sa pagsisiyasat ang mga responsable.
“IF THIS WERE COMING FROM SOMEONE CREDIBLE, I’D TAKE IT AS A COMPLIMENT: ‘Si Senator Lacson kasi ano na eh, Chief Justice Lacson, Prosecutor Lacson, DOJ Lacson, persecutor Lacson, siya na lahat. Secretary Lacson, siya na nagdidikta eh,’ —Alan Peter Cayetano,” sabi niya sa isang post sa X.
Sa kanyang pinakahuling livestream nitong Martes, inireklamo ni Cayetano ang paglilinaw ni Public Works Secretary Vivencio “Vince” Dizon na nagpapatuloy pa ang imbestigasyon sa ilang proyekto sa Taguig City, at ang mga unang natukoy na iregularidad ay kailangan pang sumailalim sa karagdagang validation—at iginiit na dapat panindigan ni Dizon ang sinabi nito noong Biyernes na walang ghost projects doon.
Iginiit din niya na si Lacson ay naging “Chief Justice,” “Prosecutor,” “DOJ” at “persecutor.”
Samantala, nanindigan si Lacson na hindi niya kayang manahimik sa harap ng maling gawain, at sinabing patuloy siyang ginagabayan ng ebidensya.
“Hindi ito personalan. Kung may nakita kang anomalya, ipipikit mo ang mata mo?” sabi niya sa isang panayam sa DZMM radio nitong Martes.
Sinabi ni Lacson na ang mga anomalya na natuklasan niya sa mga flood control project noong nakaraang taon ang nagtulak sa kanya na magsagawa ng mas malalim na pagsisiyasat, na kalaunan ay humantong sa kanyang paghahatid ng dalawang privilege speech na nagdetalye sa tinawag niyang korapsyon sa mga proyekto sa Bulacan at Oriental Mindoro.
Bilang chairman noon ng Senate Blue Ribbon Committee, pinangunahan niya ang mga pagdinig na nakatuklas ng higit pang ebidensya, na naging daan naman sa pagsasampa ng mga kaso laban sa ilang personalidad.
“Na-cascade ito sa kaso ngayon whether sa Sandiganbayan o Ombudsman. Palagay ko nakatulong ang aking team sa pag-expose ng anomalya sa flood control,” aniya.
Sa isang panayam sa DZBB radio nitong Lunes, muling sinabi ni Lacson na patuloy niyang sasagutin ng mga resibo ang mga alegasyon ni Cayetano.
Nauna nang nagsumite si Lacson at ang kanyang team sa Office of the Ombudsman ng hindi bababa sa 45 case study na suportado ng mga opisyal na dokumento at nagdedetalye sa tinawag nilang “systemic anomalies” sa mga flood control infrastructure project sa Taguig. Kasunod nito, nagsagawa ang Ombudsman ng fact-finding investigation sa mga alegasyon.
Nagsumite rin sina Lacson at ang kanyang team sa Ombudsman ng mga ebidensyang nakalap nila kaugnay ng umano’y ilegal na reclamation at mga infrastructure project sa bahagi ng Laguna Lake na sakop ng Taguig City.
“Ako naman sumasagot lang. Pag nagsasalita siya ang balik ko sa kanya, resibo,” aniya. Ernie Reyes
