MANILA, Philippines – Si Senior Associate Justice Marvic Leonen ang magsisilbing acting Chief Justice kapag nabakante ang puwesto sa pagretiro ni Chief Justice Alexander Gesmundo sa Nobyembre 6, 2026, ayon sa Supreme Court (SC).
Ipinaliwanag ni SC spokesperson Camille Ting na sa ilalim ng Section 12 ng Republic Act No. 296 o Judiciary Act of 1948, ang pinakasenior na Associate Justice ang pansamantalang gaganap sa tungkulin at kapangyarihan ng Chief Justice hanggang sa maitalaga at makapagkwalipika ang kapalit nito.
Si Gesmundo, ika-27 Chief Justice ng bansa, ay sasapit sa mandatory retirement age na 70 sa Nobyembre 6.
Samantala, inimbitahan ng Judicial and Bar Council (JBC) ang limang pinakasenior na mahistrado bilang preferred candidates para sa susunod na Chief Justice—sina Leonen, Alfredo Benjamin Caguioa, Ramon Paul Hernando, Henri Jean Paul Inting at Rodil Zalameda.
Nominado rin ni retired Associate Justice Arturo Brion si Associate Justice Jose Midas Marquez para sa posisyon.
May 90 araw ang Pangulo mula sa pagkabakante ng posisyon upang pumili ng bagong Chief Justice mula sa shortlist na isusumite ng JBC. RNT
