MANILA, Philippines – Umalis na sa board of directors ng Terra Solar Philippines Inc. (MTerra Solar) si Batangas 1st District Representative Leandro Leviste, ayon sa anunsiyo ng kumpanya nitong Biyernes.
Ang MTerra Solar ay kaanib ng Meralco PowerGen Corp. (MGEN).
Epektibo noong Enero 21, 2026 ang board reorganization na kaugnay ng paghahanda ng MTerra Solar para sa commissioning at unang pag-inject ng enerhiya mula sa solar farm nito sa Central Luzon papunta sa national grid.
Pinalitan si Leviste ni MGEN president at CEO Emmanuel Rubio.
Ayon sa MTerra Solar, layunin ng pagbabago sa pamunuan na mas iayon ang oversight ng board sa pagpapatupad at operational readiness habang papalapit ang proyekto sa commercial operations.
Nakaplanong simulan ang energization ng unang phase ng 500-kilovolt substation nito sa Nagsaag-San Jose transmission line ngayong quarter, at umabot sa 1,500 megawatts pagsapit ng Agosto 2026.
Ang MTerra Solar ay subsidiary ng SP New Energy Corp. (SPNEC), na nag-aplay ng corporate name change sa MGEN Renewable Energy Holdings Inc. Itinatag ni Leviste ang Solar Philippines Power Project Holdings Inc. (SPPHI), na pinatawan ng P24 bilyong multa ng Department of Energy dahil sa hindi pagtupad sa power commitments sa higit 30 government service contracts. RNT
